簡單週末－Faces and Places

大嬸係一個好懶惰o既人, 如果要我日日同唔同o既朋友食飯去玩, 簡直係要咗我條命, 星期六日唔約人, 留o係屋企其實都唔錯, 真正休息.

我覺得今個星期六日都過得好開心, 好簡單但係好滿足.

先講星期六, 平時冇乜特別事, 就會同老豆去飲早茶, 搞吓D銀行業務, 或者返家寫吓blog. 今個星期六, 約了一個識咗廿幾年o既死黨一齊食lunch, 然後去某銀行搞的investment seminar. 雖然大嬸在銀行工作多年, 但係從來冇去過任何investment seminar, 加上我呢個死黨係股票發燒友, 所以咪約佢一齊去囉. 我希望可以從中偷師, 同D客講起個market都有多D資料嘛.

Seminar之前先去食lunch, 大家都已經食咗早餐打底, 時間又早, 所以決定去食D light o既o野. 我揀咗尖沙咀Charlie Brown Cafe, 地點就腳, 又有特色, 坐得好舒服, 幾乎唔想走.

我點咗杯short Latte, 上面用朱古力粉弄了個人頭 (唔知佢叫乜名, sorry~), 隻杯好得意, 而且杯咖啡都幾好飲. 我個friend叫咗個雞肉沙律包都好好食, 個包焗過, 好香.

飲完咖啡就去洲際酒店的investment seminar. 呢個seminar真係搞得唔錯, 我覺得有得益, 日後同客講起個市況, 都有D資料可以吹吓. 最搞笑就係我個personal banker都在場, 仲打電話俾我睇下我嚟咗未, 話未見過要見下兼俾張咭片我喎. 就係咁, 我就見到呢位十分年輕o既banker 喇, 不過最後都收唔到佢張咭片. 洲際酒店的點心很好吃, 我個friend都話呢個seminar搞得好過其他bank. 哈哈. 到底係邊間bank 搞investment seminar?唔講得, 費事幫人賣廣告.

去完seminar就去做瑜伽. 唔知係唔係呢排日日o係屋企做收腹動作, 感覺上堂做o既動作容易咗, 阿sir話我做得唔錯添. 瑜伽真係一個好好的運動, 每次做完, 都覺得肩頸的疼痛大為改善, 又可以使身體變得柔軟, 值得持之以恒. 唔經唔覺, 都做咗兩年瑜伽喇.

星期六係阿媽的農曆生日, 屋企傳統係唔會點慶祝, o係屋企食飯就算. 上次老豆生日我唔記得咗表示下, 趁阿媽生日, 一次過補番, 算係做女兒o既小小心意, 希望兩老身體健康.

星期日, 一早同老豆飲茶, 陪老豆講吓財經時事, 佢已經好開心. 跟住就係去慕道班. 今日開始, 慕道班教新約. 唉~ 終於挨完舊約喇! 老實講, 救恩史真係好悶, 同埋以前冇乜點讀過舊約, 有時真係唔知修女講緊乜. 新約四福音就唔同喇, 以前讀基督教學校, 會考又讀過Regious Studies, 對新約熟悉D, 聽修女講課都有心機D.

慕道班之後就同一個教友去mass, 然後同三個教友一齊食飯. 其中一個就係千人婚慶o既舞台總監. 佢哋三個都係好虔誠o既基督徒, 為教會出力做事. 我只有仰慕佢哋, 不過我諗我冇咁o既幹勁喇. 唔...... 我相信天主造人, 每個人都有唔同o既長處, 我深信我係一個有用o既人. 呢餐飯食得好愉快, 食物很不錯, 而且很便宜, 意外之喜. 總監教友告訴我很多復活節的禮儀的意義, 還說下一年要捉我一齊去. 去當然是沒問題, 她是這麼的熱心, 不過我有點內疚, 因為我沒有請她做我的代母, 請了另一個堂區, 我的多年好友做代母. 她也認識我的代母, 所以, 我相信她不會介意少了我這個代女.

午餐後我們分道揚鏢, 我去了逛花墟. 花墟的奇花異卉真是多得令人眼花瞭亂, 而且很便宜, 看得我頭都昏了. 雖然很想買點花回家, 不過最後只買了一個花瓶, 是一個紅色十吋左右高的, 很簡約很好看, 才55大元, 一D都唔貴.

買完花樽, 先至兩點幾, 忽然諗起好耐冇去過行聯合廣場, 就順便去逛一下, 沿途順道買咗包Wasabi餅乾孝敬我個partner O小姐.

聯合廣場一向都係潮流服飾的集中地, 不過價格比較大眾化, 適合年輕人. 我隨便地逛了一圏, 覺得衣服都不大合我的年紀 (我老嘛 ), 也不能上班時穿, 所以我只買了兩件T shirt, 上面都有很精緻的圖案, 左邊的是粉紅色, 右邊的是淺灰色. 個strawberry cake靚到想食呀~ 右邊o個件, 對高跟鞋上面有立體絲帶同掛住一粒星星, 最抵死o既係兩件Tee後面都有小小圖案, 好精緻. 日本衫就係咁detail.