今年三月, 大嬸的公司派 BONUS時......
今日係派bonus信的日子, 滿心期待有幾多個月人工收? 外面說分二三四個月是平常事, 那我們至少都有一至兩個月吧? 看到老細入大老細房, 好耐都唔出嚟, 我覺得好奇怪. 終於, 老細返回佢間房, 仲叫我入去收信.
一坐低, 佢把bonus 信攤在枱面, 我一見到個數字, 嘩............ 咁"多"嘅..............
老細遞咗個計數機俾我, 一計, 哈哈, 真係多謝哂, 人哋台灣隊個高貴嘅team head 肩上的LV手袋都買唔起.
喺呢個時候, 應該俾乜嘢反應呢? 黑面? 拍枱? 定係苦笑?
我仲未做反應嘅時候, 老細已經閂定後門. 我老細話: "老實講, 我喺大老細房入面咁耐, 都係講你單嘢. 我同大老細講, 我唔滿意你收咁少."
大老細話: CC佢先得一年經驗, 唔應該得咁多bonus.
我老細: 佢係唔夠經驗, 不過佢同有經驗嘅人比, 佢做得好好, pick up 得好快.
大老細: ..............
我老細: 我想同佢做一次半年review, 然後加番俾佢.
大老細: ok! go ahead!
以上就係我老細講番俾我聽嘅. 内容真實性有幾高, 我唔知. 我絕對相信, 老細即使會同我做半年review, 甚至話加我人工, 都係安撫住我先嘅說話. 半年review 咗之後, 話我做得好好又點? 只要大老細一句: "我哋要跟總公司, 一年先可以加一次薪, 冇exceptional case!" 咁已經冇嘢講喇. 講真, 我係老幾呀? 使為我做exceptional approval? 再諗深一層, 年中加人工, 加到幾多? 至多追得上通漲. 當然啦, 年頭先加完, 年中又加, 至多咪加幾百蚊生果金.
老細明知我知其他人會收得多過我, 所以早早同我講, 話佢唔滿意, 會幫我爭取, 又叫我俾心機做多d marketing, 又話我有talent 等等, 無非想安撫我不滿嘅情緖. 哈哈, 咁快閂定後門, 我即使有滿腔不滿, 一腔熱血都無處發洩! 不過, 好奇怪, 收信嘅時候我真係心如止水, 冇乜失望, 因為我從來就唔係抱好大希望. 我事後諗番, 都覺得自己好冷靜, 而且仲識笑添. 老細可能冇諗過我會咁冷靜, 佢個表情有少少奇怪, 好似少少驚咁. 老細不斷話:" 你有乜要講呀, 等我哋可以配合得好d呀!" "俾心機呀, 希望我哋條team 做得好d, 攞多d resources" 之類嘅說話.
而家諗番起, 我當時真係幾好戲, 仲可以保持冷靜嘅頭腦同燦爛嘅笑容, 真不愧喺C記銀行做咗七年, 好戲到我自己都佩服自己.
Anyway, 落咗袋嘅先至係自己嘅, 未來嘅事, 誰可以保證?
全站熱搜
留言列表
